Kryeministri Edi Rama ishte i pranishëm sot në ceremoninë e diplomimit të 1,600 studentëve të Universitetit të Mjekësisë.
Mirëpo gjatë fjalës së tij të mbajtur, kreu i qeverisë u has me kundërshtime. Një i ri i pranishëm i ka ngritur atij zërin, por Rama e mori me sportivitet këtë gjë duke ia kthyer me batutë.
“Është një individ në shërbimin tuaj që të filloni të ushtroni profesionin. Merreni, jepini recetën e duhur. Në kohën e kaq shumë barnave të rimbursueshme i merr falas dhe nesër do të jetë më mirë”, tha ai.
Por mesa duket, studenti në sallë nuk e ka lënë me kaq teksa e ka ndërprerë sërish kryeministrin në fjalën e tij.
“A e dini që studentët që arsimohen sot janë vetëm të pasur?”, ishte pyetja që ai i drejtoi kreut të qeverisë.
“Jepjani pra recetën atij tani. Ndërkohë që djalin duhet ta shoqëroni të marrë shërbimin e shpejtë mjekësor, pyetja që a e dini që studentët që arsimohen sot janë vetëm të pasur ka përgjigjen që kjo është e pavërtetë. Sot ndryshe nga deri dje studentët janë të trajtuar më mirë se deri dje dhe këtë e dini të gjithë ju që jeni këtu dhe prindërit tuaj. Tek ata që janë të shkëlqyer ka plot që janë me vështirësi ekonomike”, u përgjigj Rama.
