Pas më shumë se një viti mësimi online, studentët dhe pedagogët do të rikthehen sot në auditore, për vitin e ri akademik 2021-2022. Sikundër është njoftuar edhe më herët, studentët duhet të paraqesin certifikatën e vaksinës ose një vërtetim që kanë kryer të paktën një dozë, ose duke paraqitur një test PCR negativ.
Nëse studenti nuk paraqet asnjëherën nga kushtet e vendosura, nuk do lejohet të futet brenda auditorit. Po kështu janë parashikuar të stacionohen punonjës sigurie, me qëllim për të mos lejuar asnjë student “të pabindur”, i cili nuk është i vaksinuar apo me test PCR të marrë pjesë në leksione a seminare. Bashkë me punonjësit e sigurisë është ngarkuar edhe struktura administrative, të rakordojë hyrje-daljet në fakultete.
Rektori i Universitetit të Tiranës, Artan Hoxha, pohoi tre ditë më parë se mbi 50% e studentëve janë vaksinuar. Po kështu, pikat e vaksinimit në fakultete do të vijojnë që të funksionojnë, për të gjithë ata studentë që nuk janë vaksinuar.
