Ministri i Brendshëm, Sandër Lleshaj, gjatë një inspektimi të bërë sot në terren për respektimin e masave, ka apeluar ndaj qytetarëve të raportojnë për rastet e shkeljes së karantinës nga personat e infektuar me Covid-19. Ai vuri në dukje se policia i ka informacionet e plota për individët e infektuar, por bashkëpunimi me qytetarët është thelbësor në betejën me Covid-19.
“Duhet ta parandalojmë sa kemi mundësi. Duhet të mbrojmë stafet shëndetësore. Bashkëpunimi ynë për respektimin e masave është ndihma më e madhe.
Duhet të njoftojmë policinë për ata që nuk i binden masave dhe karantinës. Policia i ka të plota informacionet, por bashkëpunimi ndihmon shumë. Është mjaft i rëndësishëm koordinimi i përpjekjeve. Të mbrojmë veten tonë, mjekët dhe policët”, tha Lleshaj.
Ndër të tjera, ministri Lleshaj tha se ka një mobilizim të madh, por virusi është një rrezik real që ndodhet në një fazë kritike. Ai kërkoi bashkëpunim, ku të mos presim që virusi të trokasë tek ne, por të shohim rrezikun real të tij.
