Një çift nga Wuhan të cilët u trajtuan në spitalin e Romës për koronavirus, kanë vendosur t’i dhurojnë institucionit 40 mijë euro pas shërimit të tyre.
Bëhet me dije se ata ishin pacientët e parë me koronavirus në Romë. Çifti kishte udhëtuar nga Wuhan drejt Italisë si turistë dhe u detyruan të izoloheshin atje.
Ata u shtruan në spitalin “Spalanzan”, ku qëndruan për 40 ditë. Dyshja rreth të 60-tave u detyruan të kalonin nëpër disa faza rehabilitimi, duke përfshirë terapinë intensive.
Në muajin prill ata morën lajmin se ishin shëruar. Gruaja filloi të qante nga gëzimi kur doli nga spitali, ndërsa personelit mjekësor të spitalit i tha: “Ju dua, e dua këtë qytet italian”.
Por nuk mjaftoi vetëm kjo si shenjë mirënjohjeje, pasi çifti vendosi t’i dhuronte spitalit shifrën marramendëse prej 40 mijë eurosh.
Zyrtari i qeverisë rajonale i ngarkuar me çështjet e shëndetësisë, Alessio D’Amato, e cilësoi donacionin e çiftit kinez “një dhuratë të madhe” dhe i ftoi që të dy për një vizitë tjetër në Romë.
