Kryeministri Rama, së bashku me ministren e Shëndetësisë, Ogerta Manastirliu, kanë inspektuar nga afër punimet në Spitalin Infektiv, pasi do të rikthehet në funksion më 15 tetor. Investimi në Spitalin Infektiv kap shifrën e 5.6 milionë euro. Me këtë investim, spitali do ketë standarde ndërkombëtare si dhe zgjerim të kapaciteteve pritëse kryesisht për shërbimet e terapisë intensive.
Ministrja Manastirliu njoftoi se tashmë është drejt përfundimit të punimeve, të rehabilitimit të Spitalit Infektiv.
“Jemi drejt përfundimit të punimeve, të rehabilitimit të Spitalit Infektiv. Tashmë jemi në 70% të punimeve dhe rreth datës 15 tetor shpresojmë që të përfundojmë së bashku me mobilimin dhe pajisjet.
Pra ta kemi funksional Spitalin Infektiv që tashmë kthehet në një qendër të vërtetë ekselence dhe reference për të gjithë sëmundjet infektive.
Kemi rritje të kapaciteteve. Është një spital që nuk është thjesht një investim për 10 vite, por është për 30 vitet e ardhshme. Kemi 118 shtretër. Kemi dyfishuar kapacitetet e Reanimacionit, duke krijuar dy ambiente.
Pra nëse kemi sëmundje infektive të njohura, mund të trajtohen në ambientin A dhe për sëmundjet infektive të panjohura sikurse kishim rastin për covid 19, do të ketë një zonë specifike. Pra janë organizuar në mënyrë të atillë që edhe të përgjigjen ambientet për emergjenca të ndryshme të shëndetit publik”.
