Spitali i Durrësit është kthyer në karantinë.
Raportohet se Policia ka vendosur shirit duke rrethuar të gjithë spitalin ndërkohë forca të shumta policie ndodhen pranë spitalit rajonal për të bërë largimin e personave të paautorizuar.
Kujtojmë se sot në mesditë, në spitalin e Durrësit ndërroi jetë një 73-vjeçare, e cila thuhet se pati komplikacione të rënda shëndetësore për shkak të koronavirusit.
Ajo është njëherazi viktima e parë e shënuar në Shqipëri nga COVID-19.
Çfarë nënkupton karantina?
Karantina nënkupton izolimin e një personi ose grupi njerëzish të cilët kanë qenë të ekspozuar ndaj sëmundjes ngjitëse, por që nuk kanë simptoma. Kjo masë merret për parandalimin e përhapjes të kësaj sëmundjeje.
Karantina zakonisht përcaktohet për periudhën e inkubacionit të sëmundjes ngjitëse.
Për COVID-19, periudha e karantinës është 14 ditë, nga data e fundit e ekspozimit, sepse 14 ditë është periudha më e gjatë e inkubacionit që shihet për koronaviruse të ngjashme. Dikush që është liruar nga karantina për COVID-19 nuk konsiderohet rrezik për përhapjen e virusit te të tjerët.
