Kryeministri Rama nga aeroporti i Rinasit iu është përgjigjur interesit të medieve lidhur me skandalin dhe dëshminë e dhënë nga Dëshmitari X, Albert Veliu mbi trafikun e drogës së Agron Xhafajt, vëllait të ministrit të Brendshëm. Rama dukej tërësisht i sikletosur kundrejt pyetjeve të gazetarëve, ndërsa filloi të përdridhej sa i përmendej emri i Tahirit, Xhafajt, dhe skandalit të tyre.
Zoti Kryeministër, mund ta na thoni se cilës firmë iu drejtuat për autenticitetin e audiopërgjimit?
Nuk i jam drejtuar asnjë firme por një agjencie, adresën nuk mund tua jap, ajo që kam bërë ka qenë urgjente, duhet ta identifikojë dhe certifikojë prokuroria, por për sa më takon jam shumë i qartë e përsëris bëhet fjalë për një maskaradë të organizuar me qëllime të qarta për të gjithë dhe e motivuar nga frymëzimi malinj për të bërë çmos për të penguar dhe mundësisht hedhur në erë negociatat për anëtarësi të vendit, besoj se dita e djeshme duhet tu ketë dhënë mundësinë të shikoni mes audiovideo shpk së PD se në çfarë derexheje është katandisur PD se çfarë mungesë respekti ka PD për inteligjencën e shqiptarëve dhe pse ka pritur pikërisht këtë kohë për të bërë këtë gjë për diçka që e ka pasur në dorë më parë. Në një kuptim e falënderoj PD që e bëri shumë të lehtë demaskimin e kësaj maskarade me atë shfaqje që dha dje në teatrin e shqup-it
Ka emër agjencia, i keni vërtetuar nëse është zëri i Agron Xhafajt aty?
Përgjigja imë është e qartë dhe e prerë ajo që iu servir publikut si autentik është thjesht dhe vetëm një manipulim i shëmtuar, pastaj detajet, si dhe pse të manipulimit janë të prokurorisë dhe debatit pse u bë kjo dhe në këtë moment.
Nuk i besoni dëshmitarit të PD?
Pse ju i besoni? Ju mendoni që ka vlerë që ne të diskutojmë për këtë nuk kam më përgjigje për këtë.
Ka dalë me emër e mbiemër, pse nuk i besoni?
Unë jam sy, kam dhe veshë, fillimisht nuk i besova syve dhe veshëve pastaj u detyrova t’i besoj dhe ajo që pashë është ajo që panë të gjithë.
Zoti kryeministër, ju dhatë garanci për Elvis Roshin dhe e shkarkuat dhe më parë dhatë për Tahirin dhe pastaj e larguat. Pse duhet t’ju besojnë sot shqiptarët për këtë rast?
Rama: Së pari me shqiptarët merrem vesh vetë. Së dyti kam qëndruar strikt në rastet që përmendni dhe do bëja të njëjtën gjë i jam referuar atyre që kam ditur dhe nuk i heq asnjë presje as sot atyre që kam thënë, për Tahirin, nuk kuptoj ku lidhen këto. Në rastin konkret nëse është cenuar moralisht figura e Ministrit të Brendshëm unë e kam marrë dhe ai do të jetë në krye të detyrës që e bën me përgjegjshmëri dhe me rezultate shumë domethënëse.
