Sot, Prokuroria e Posaçme Antikorrupsion nisi zyrtarisht punën. Tetë prokurorët e SPAK u betuar një ditë më parë te Presidenti.
Kreu i zgjedhur nga KLP, Arben Kraja u paraqit këtë të premte në ambientet e kësaj strukture. Prezantimin e tij e bëri kreu i KLP-së, Gent Ibrahimi, i cili e konsideroi këtë momenti “historik” për të gjithë. “Fillim viti do të jetë intensiv për të gjithë ne”, shtoi ai.
Ndërkaq, Kraja falenderoi anëtarët e KLP-së që i dhanë besimin duke e votuar, por edhe ata që votuan për dy kandidatët e tjerë. “Do të bëjmë një skuadër shumë të fortë. Koha është për punë dhe jo për llafe”, theksoi Kraja.
Prokurori i Prokurorisë së Përgjithshme, Arben Kraja, mori 6 vota nga anëtarët e KLP nga 4 vota që mori Altin Dumani. Ndërsa kandidati i tretë, Edvin Kondili mori vetëm votën e kryetarit të KLP, Gent Ibrahimi.
