Nënkryetari i PD-së Edmodn Sapo, i cili u përjashtua nga seanca e të enjtes që lamë pas, ka folur për “News 24”, duke u shprehur se Rama ka urdhëruar Ruçin që të mos lërë opozitën me fol.
“Ruçi ka marrë porosi nga Rama që të bëhet gardiani i opozitës, që të mos të na lejohet të flasim. Ne kemi marrë një mesazh nga qytetarët shqiptarë në protestën e 27 Janarit. Ne kemi një qëndrim, dhe do te kemi aksion politik. Do të ketë protesta në rrugë dhe luftë politike në Kuvend.
Intensiteti i protestave do varet nga pjesëmarrja dhe mund të shtrihet në qytete të tjera. Ne do t’i përgjigjemi me çdo kusht. Nuk do të lejojmë që të na hiqet e drejta e fjalës. Ne nuk do të lejojmë që të marrim leje nga Gramoz Ruçi se çfarë do të themi, në të kundërt do të dukemi fiktivë aty”.
Kujtojmë që Ruçi, të enjten i ndërpreu fjalës Spahos, teksa po fliste nga foltorja e Kuvendit për ekstradimin e Nezar Seitit, i njohur si “financieri”, i Habilajve, dosje në të cilën është implikuar dhe ish-ministri i Brendshëm Saimir Tahiri.
Spaho, më tej gjatë fjalës së tij u shpreh se: “Jo vetëm ministrja e Drejtësisë por edhe Prokurorja e Përgjithshme kanë gisht në ekstradimin e Seitit. Pra po rezulton se vendosja e Prokurores së Përkohshme të Përgjithshme ishte prishja e provave për Tahirin. Gjithashtu u shkarkuan dhe Prokurori i Tiranës dhe ai i Durrësit. Sot, Seitaj ka ikur në Itali dhe ai nuk mund të hetohet më këtu. Por, në Shqipëri ai nuk kthehet më”. TIRANA TODAY
