Kryeministri Rama nuk është i pranishëm në Tiranë, në ditën që sot mbahet protesta kombëtare e opozitës përpara Kryeministrisë. Që prej ditës së djeshme, kreu i qeverisë shqiptare ndodhet në Paris ku merr pjesë në panelin e Forumit të Paqes. Rama ka publikuar një foto album në rrjetet sociale, të disa momenteve nga forumi i mbajtur të premten në Paris.
“MIRËMËNGJES
dhe me FotoALBUMIN e një dite krejt të posaçme në Paris për Forumin e Paqes, ju uroj një fundjavë të bukur”, shkruan Rama bashkëngjitur fotove në fjalë.
Sot në orën 16:00 zhvillohet protesta e thirrur nga opozita. Një ditë më parë, kreu i Partisë Demokratike, Sali Berisha, paralajmëroi kryeministrin Rama se nuk do t’i shpëtojë dot përballjes me popullin.
Nga selia blu, kryedemokrati u tregua i rezervuar për skenarin e saj, ndërsa thekoi se ish-kryetari i PD, Lulzim Basha nuk duhet të bëhet pjesë e protestës.
Për protestën e opozitës që do të mbahet në Tiranë ka reaguar edhe Policia e Shtetit. Në një deklaratë të saj u njoftua se do të ketë bllokime të disa segmenteve rrugore, në varësi të lëvizjes së pjesëmarrësve në tubim.
