PD do të mbledhë sot Kuvendin Kombëtar. 7500 të deleguar do të mblidhen në ish-Pallatin e Kongreseve në Tiranë në orën 11:00, për të zgjedhur 300 anëtarët e rinj të Këshillit Kombëtar. Sipas statusit, jo më pak se 30% femra dhe jo më pak se 15% të rinj deri në 35vjeç. Emrat e kandidatëve të propozuar janë publikuar në faqen zyrtare të PD-së.
Mes 600 emrave të propozuar në Kryesinë e Partisë Demokratike nga kryedemokrati Lulzim Basha, delegatët e vjetër të Kuvendit do të përcaktojnë me votë 300 anëtarët e rinj të këtij forumi, që do të përzgjedhë më pas edhe Kryesinë e re, ndonëse kësaj të fundit ende si ka mbaruar mandati.
Basha ka dërguar për votim të gjithë anëtarët e Kryesisë dhe ata të Këshillit Kombëtar, përfshi edhe kritikët e tij, Edith Harxhin, ish-Sekretarin e Përgjithshëm Arben Ristani dhe Kryetarin e Këshillit, Bujar Nishani. Mirëpo ky i fundit, për shkak të posteve të larta që ka mbajtur nuk i nënshtrohet votimit duke u zgjedhur automatikisht.
Në listën që Partia Demokratike ka publikuar, spikasin disa emra të rinj, por edhe të vjetër. Kandidat është djali i të ndjerit Sokol Olldashi, Glauk Olldashi, regjisori Robert Budina, gazetarja dhe moderatorja Orjela Nebiaj, por edhe ish-lojtari i kombëtarës shqiptare, Andi Lila.
