Mos dakordësimi për Reformën Zgjedhore deri në afatin e përcaktuar, atë të 31 Majit, ka sjellë sot reagimet e përfaqësuesve ndërkombëtarë.
Sikundër ambasadorja amerikane Yuri Kim, edhe ambasadori i BE-së, Luigi Soreca ka reaguar për Reformën Zgjedhore.
Përmes një statusi në rrjetet sociale, Soreca shkruan se përfundimi i Reformës Zgjedhore në përputhje me rekomandimet e OSBE/ODHIR, mbetet kusht i domosdoshëm për të ecur përpara me integrimin në BE.
Soreca i bën thirrje palëve politike që të mbajnë fjalën, dhe të kalojnë në zbatimin e premtimeve të tyre për Reformën Zgjedhore.
“Përfundimi i Reformës Zgjedhore, plotësisht në përputhje me rekomandimet e OSBE/ODHIR, është kusht i domosdoshëm për të ecur përpara me integrimin në BE.
Një marrëveshje e menjëhershme nga të gjitha palët në Këshillin Politik, është e mundshme dhe duhet të përfundohet tani për të filluar me negociatat e pranimit në BE sa më shpejt të jetë e mundur”, njofton Soreca.
