Ambasadori i BE në Shqipëri Luigi Soreca deklaroi se Bashkimi Evropian do të sjellë kite të tjera testimi në vendin tonë.
Në një konferencë të përbashkët me Ministren e Shëndetësisë Ogerta Manastirliu, Soreca theksoi se BE qëndron pranë Shqipërisë në këtë periudhë të vështirë ku vendi është goditur nga koronavirusi.
“Ne po shohim që në këtë fazë do ketë një relaksim të masave. Këto mjete mbrojtëse do të hynë në punë. Faktet flasin vetë. Ne qëndrojmë pranë Shqipërisë, jemi më afër se kurrë. Së bashku jemi më të fortë.
Ndaj kjo është edhe tema që kemi zgjedhur për javën e Europës, që nis sot. Më lejoni së pari të them, pasi jemi në fazë që qeveria të relaksojë disa nga masat, duhet të themi se disa prej tyre janë marrë që në krye të herës.
Me sa shikojmë, parametrat epidemiologjikë po ecin në mënyrë të duhur dhe qeveria ka vendosur që të lehtësojë disa nga masat. Ato masa që u ndërmorën nga qeveria, nuk do të kishin qenë të mundura nëse nuk do të ishin qytetarët ata që do t’i zbatonin ato.
Kjo nuk do të thotë se nuk duhet të vazhdojmë që të jemi të disiplinuar në të ardhmen. Ndaj duhet të bëjmë kujdes dhe në të ardhmen”, u shpreh Ambasadori.
