Presidenti Ilir Meta shfuqizoi dekretin për zhvillimin e zgjedhjeve vendore të 30 qershorit. Ky vendim nuk u prit aspak mirë nga deputetët e mazhorancës, të cilët e cilësuan një akt antikushtetues, ndërsa kërkojnë menjëherë largimin e presidentit Meta nga posti, duke e zhveshur atë nga kompetencat.
Ditën e sotme, Meta ka dalë në një konferencë për shtyp, ku dha të gjitha shpjegimet politike dhe ligjore që e çuan të merrte këtë vendim të “papritur”.
Në fjalën e mbajtur, presidenti e konsideroi këtë moment si rrezik serioz për sigurinë publike, stabilitetin demokratik, qetësinë dhe paqen në vend, ndërsa theksoi se pa pasur një datë të caktuar nga vetë ai nuk mund të mbahen zgjedhjet, të cilat janë shtyrë në një afat të pacaktuar.
Për Metën kjo lëvizje ishte e domosdoshme, pasi sipas tij pjesëmarrja në zgjedhje vetëm e mazhorancës cenon parimin kushtetues të pluralizmit. Ndër të tjera, argumentoi se zhvillimi i zgjedhjeve në kushtet e një situate të tensionuar politike, mund të sjellë si pasojë jo vetëm mospjesëmarrjen në zgjedhje të rreth gjysmës së votuesve, por krijon edhe rrezikun e një konflikti civil.
Pavarësisht këtij vendimi, kryeministri Rama jo vetëm që shfaqet i bindur se zgjedhjet do të mbahen me 30 qershor, por vijon me zhvillim e fushatave elektorale, e prej nga ku kërkon që Meta të mos qëndrojë më në atë zyrë, pasi sipas tij nuk e meriton.
Disa ditë më parë, në një kohë kur vendimi ende nuk ishte marrë, Tirana Today pyeti qytetarët në një sondazh nëse ata mendonin se data e zgjedhjeve vendore duhet të shtyhej apo jo.
1,299 votues morën pjesë në sondazhin me pyetje “A duhet të shtyhet data e zgjedhjeve vendore?”, përgjigjet e të cilëve ishin:
JO- 836 vota ose 55,34%
PO- 463 vota ose 35.64%
Duke iu referuar mënyrës se si kanë votuar qytetarët, shumica mbanin qëndrim se vendi duhet të shkonte në zgjedhje.
Data 30 qershor po afron, e nuk na mbetet gjë tjetër veçse të shohim nëse mazhoranca do i qëndrojë deri në fund bindjes së saj, e nëse po çfarë taktikash do të përdorë, apo do të pranojë caktimin e një date tjetër./ Tirana Today
