SONDAZHI/ A duhet të bëjë Shqipëria zgjedhje të parakohshme

Ndonëse bënë përparime të konsiderueshme, Shqipëria dhe Maqedonia e Veriut sërish nuk ia dolën që të merrnin dritën jeshile për hapjen e negociatave. Liderët e vendeve të BE-së, nuk arritën të merrnin një vendim për hapjen e negociatave me Shqipërinë dhe Maqedoninë e Veriut.

Presidenti francez Emannuel Macron, vendosi veton përkundrejt shumicës dërrmuese të vendeve anëtare të BE-së, i bindur se progresi nuk mjafton, dhe se më parë duhet reformim i brendshëm i BE-së.

Macron deklaroi se para se Bashkimi Evropian të vendosë për zgjerimin, duhet të reformojë së pari veten. Teksa vlerësoi arritjet dhe progresin e Maqedonisë së Veriut dhe Shqipërisë, ai tha se vendi ynë ka ende probleme me azilkërkuesit. “Nëse ne nuk funksionojmë si duhet me 27 anëtarë, si mund të jetë më mirë me 28, 29 apo 30. Nuk e ndjejmë ende veten gati për të hapur derën, pavarësisht se e dimë që kishte shpresë të madhe te vendet që kanë bërë përparime. Popujt nuk janë fajtorë, por ne kërkojmë reforma konkrete”, shtoi Macron.

Sakaq, kryeministri Rama ka folur sërish për çështjen e negociatave me BE, në një intervistë për median italiane “Panorama”. I pyetur për refuzimin nga ana e BE-së, Rama u shpreh se nuk është e këndshme të jetosh me ndjesinë e plotë se je tallur.

E megjithatë, tha se synimi mbetet një vend evropian. “Nuk është se nuk e kisha menduar këtë pengesë. Pjesërisht, e prisja. Por, nuk është asnjëherë, as e bukur dhe as e thjeshtë, të jetosh me ndjesinë e plotë se je tallur. Në çdo rast, siç e përsëris gjithmonë, duhet të vazhdojmë në të njëjtin drejtim, pasi nuk ka alternativa të tjera përveç se një Shqipërie europiane. Mbetet detyra jonë përballë brezave që do të vijnë”.

“Tirana Today” pyeti qytetarët në një sondazh, nëse Shqipëria duhet të bëjë zgjedhje të parakohshme. Në këtë sondazh morën pjesë 1.677 votues.