Drejtuesi i “Fundjavë Ndryshe”, Arbër Hajdari është shprehur se ndihma monetare e mbledhur deri më tani për të prekurit nga tërmeti është mbi 2 milionë euro.
I ftuar në emisionin “Opinion”, Hajdari tha sa solidariteti ka qenë i madh, teksa shton se kamionë të shumtë me ndihma kanë ardhur nga Kosova dhe Maqedonia. Sipas tij, në 8 orët e para që u hap linku në “Go Fund Me”, shuma e mbledhur nga “Fundjavë Ndryshe” ka qenë 1 milionë dollarë.
“Kanë ardhur kamionë pa fund me ndihma. Që ditën e parë, sidomos nga Kosova. Kemi punuar në disa fronte, nuk kemi bërë një maratone për të mbledhur fonte. Kemi krijuar një link dhe deri sot janë 30 mijë donatorë. Përafërsisht shuma shkon mbi 2 milionë euro. 70 për qind janë SHBA. Solidariteti ishte shumë i madh, sa hapem linkun pas 8 orëve ka qenë 1 milionë dollarë. Tani ka një lloj tërheqje, normalisht ritmi do të bjerë por ka njerëz dhe që grumbullojnë fonde edhe në vende të ndryshme të botës që presim të na bashkohen”, tha Hajdari.
