Një foto e Vuçiç i cili qëndronte para presidentit Trump, u komentua gjerësisht. Fotoja u bë virale, e madje pati edhe intepretime nga më të ndryshmet. Presidenti i Serbisë, Aleksandar Vuçiç, ka folur për median “Dnevni Avaz” pas nënshkrimit të marrëveshjes me kryeministrin e Kosovës, Avdullah Hoti, në Shtëpinë e Bardhë në Washington.
Lidhur me foton ku ai po qëndronte i ulur përballë presidentit Donald Trump, (mënyrë e cila u quajt nga mediat sikur të ishte para hetuesisë), Vuçiç tha se ai ka vepruar me përgjegjësi.
Ai u shpreh se nuk i ka shkuar në mendje që për shkak të karriges në të cilën ishte ulur në Zyrën Ovale në Shtëpinë e Bardhë, të largohej nga takimi me Trump.
“Imagjinoni presidentin e ndonjë prej vendeve tona të vogla në rajon, që të ketë një shans për të hyrë në Zyrën Ovale, për të biseduar vetëm me Presidentin e Shteteve të Bashkuara dhe që kur t’i vendosin një karrige, ai të thotë: ‘Më falni, nuk jam i interesuar për këtë karrige, do ta shkelmoj tani’…
Sigurisht që nuk më shkoi në mendje.. Unë veprova me përgjegjësi, u solla me edukatë dhe pata nderin dhe mundësinë për të pasur një bisedë të shkëlqyeshme me Donald Trump.
Unë gjithmonë do ta përsëris, sepse është detyrimi im të bëj gjithçka që mundem për vendin tim, për Serbinë. Dhe u përpoqa të bëja që gjithçka që ne propozuam të ishte në interes jo vetëm të Serbisë, por edhe të gjithë të tjerëve në rajon”, ka thënë ai.
