Kryeministri Rama ka komentuar sot aleancën e re mes ish-kryeministrit Berisha dhe LSI-së. Ai është pyetur sot nga gazetarët, nëse do të ketë përballje me aleancën e re, dhe përgjigjja ishte e prerë. Kreu i qeverisë la të nënkuptuar se diçka e tillë do ndodhte, por në të njëjtën kohë paralajmëroi se ende nuk kemi parë asgjë akoma.
Do keni përballje me aleancën e re mes ish-kryeministrit Berisha dhe LSI, si e shikoni këtë bashkim forcash?
Rama: Ska nevojë të shikojmë filxhan për të paraparë se çdo ndodhte. S’keni parë gjë akoma, mos u çudisni. Do shikoni gjëra dhe më interesante se kaq, në frontin e shtëpisë së Liries.
Dje, KQZ refuzoi regjistrimin e Komisionit të Rithemelimit në zgjedhje, si pjesë e koalicionit “Shtëpia e Lirisë”. Berisha tashmë ngelet jashtë koalicionit, dhe kjo mund të bëjë që kandidatët e tij të garojnë për LSI, ndërsa LSI përfundon me PDK-në e Nard Ndokës. Po kështu u shqyrtua kërkesa e LSI për t’u regjistruar në koalicion me PDK-në e Nard Ndokës dhe Komisionin e Rithemelimit të Sali Berishës. Sipas KQZ, ish-kryeministri Sali Berisha nuk ka parti, dhe nuk mund të marrë pjesë në zgjedhje, pasi ai përdor simbolet e një partie tjetër, Partisë Demokratike që nuk është e tija dhe nuk mund të jetë pjesë e një procesi zgjedhor.
Vendimi është marrë dje nga Komisioneri Shtetëror i Zgjedhjeve, Ilirjan Celibashi, gjatë shqyrtimit që i bëri kërkesës së LSI. Celibashi ka përjashtuar Komisionin e Rithemelimit të Sali Berishës nga zgjedhjet e 6 marsit, pasi sipas tij, simbolet e Partisë Demokratike nuk mund të pranohen në këtë koalicion, sepse cenohet interesi i një force tjetër politike.
Në fund ai e regjistroi koalicionin “Shtëpia e Lirisë” vetëm me LSI-në dhe Partinë Demokristiane të Nard Ndokës. “Kërkesa për disa aspekte të saj reflekton konfliktualitet me nenet e Kodit Zgjedhor, me interesat e ligjshme të një partie tjetër politike. Ndaj kërkesa për të përfshirë në simbole, në sigla apo në thelbin e vet elementë të Partisë Demokratike nuk mund të pranohet”, tha Celibashi.
