Sot, Veliaj zhvilloi një takim elektoral me banorët e Baldushkut. Ai i është përgjigjur vendimit të një dite më parë nga presidenti Ilir Meta, për ç’dekretimin e zgjedhjeve të 30 qershorit.
Kreu i Bashkisë së Tiranës, Erion Veliaj, e cilësoi nul dhe sipas tij pa vlerë juridike këtë akt, dhe se nuk ka asnjë dyshim që zgjedhjet vendore do mbahen në 30 qershor.
Veliaj sfidon hapur Metën: Më 30 qershor do ketë zgjedhje në të gjithë Shqipërinë!
“Në 30 qershor do kemi zgjedhje në Tiranë dhe në gjithë Shqipërinë. Kjo nuk do as mend, as kalem. As dekret, as sekret. Nuk do as sherr, as shamata”.
Në po të njëjtën linjë ka qendruar edhe kryeministri Rama, ku tha se Meta ka humbur të drejtën për të qëndruar në zyrën e Presidentit, duke paralajmëruar kështu shkarkimin e kreut të shtetit.
“Kushtetuta s’është filxhan që rrotullohet, Meta të zhduket nga zyra!”, Rama shpërthen nga Burreli
Rama tha se Presidenti u shfaq si shpëtimtar i opozitës, ndërsa shtoi se priten të tjera vendime të Metës në vijim të asaj që ai e konsideroi si çmenduri të Presidentit. Ai përsëriti sërish se pavarësisht ç’dekretimit nga Meta të datës zyrtare, zgjedhjet do të zhvillohen në 30 qershor. Kryeministri Rama ka vijuar edhe sot fushatën e tij elektorale, pavarësisht vendimit të Metës për shtyrjen e zgjedhjeve.
Nga Burreli, kryeministri tha se kjo nuk është çmenduria e fundit nga Ilir Meta, sepse ato mund të vazhdojnë.
“Dje papritur për shumëkënd por krejtësisht sipas parashikimeve tona dhe të mia, u shfaq shpëtimtar i atyre që kishin mbetur atje në rrugë, as më shumë e as më pak por Presidenti i Republikës, duke paralajmëruar një akt që politikisht është vetëvrasje, ligjërisht është nul, nuk ekziston dhe moralisht është turp si s’ka më turp.
Dhe mos u çudisni nëse ju them se nga fronti i shpëtimtarit të opozitës, s’kemi parë gjë akoma. Nuk është çmenduria e fundit, do ketë edhe të tjera, por ama një gjë është e sigurtë. Do apo s’do Saliu, do apo s’do Iliri, do apo s’do Lulzimi, do apo s’do filxhani, zgjedhjet do mbahen më 30 qershor”.
