Ministrja e Shtetit për Marrëdhëniet me Parlamentin, Elisa Spiropali, teksa ka komentuar tubimin e 2 marsit të thirrur nga presidenti Meta, hodhi hije dyshimi mbi mbështetjen e pakursyer të kryedemokratit Basha ndaj Metës. E ftuar në studion e ‘Abc News’, Spiropali kishte pikëpyetjet e saj, duke iu referuar mbështetjes së aksionit ndaj Metës në 2 mars. Ajo tha se ende nuk është e bindur se kreu i PD-së, Lulzim Basha po e bën me shpirt mbështetjen e aksionit të Ilir Metës, pasi sipas saj, do ishte absurde të mbështeste një aksion politik që do të fuqizojë Metën dhe LSI. Ministrja tha se tubimin e 2 marsit e sheh si aksion të izoluar të LSI dhe Metës.
“Është një marrëdhënie skizoide, se Lulzim Basha mirë keq ka nisur një kurs të ri opozitar të them të drejtën, është i arsyeshëm, edhe për mënyrën si reagon për çështje si koronavirusi, tërmeti, çështje që kanë interes.
Duket i arsyeshëm, bashkëpunues dhe do të krijojë profilin e një drejtuesi shteti në të ardhmen. Nga ana tjetër, ne mendojmë se është nën presionin e jashtëzakonshëm të këtyre heronjve të përhershëm, të Ilir Metës dhe Sali Berishës, sepse gjuha e tyre opozitare është krejtësisht ndryshe nga ajo e Lulzim Bashës.
Në fakt përçarja më e madhe ekziston në opozitë, por ne nuk kemi ndërmend të ndërhyjmë, sepse nuk është puna jonë, le ta gjejnë vetë rrugën. Nuk më duket se Lulzim Basha po e bën me shpirt mbështetjen e aksionit të Ilir Metës. Do ishte absurde të mbështeste një aksion politik që do të fuqizojë Ilir Metën dhe LSI. Unë e shoh si një aksion të izoluar të LSI dhe Metës personalisht”, tha Spiropali.
Prej ditësh, Meta ka paralajmëruar se në dy mars do të mbajë një protestë kundër qeverisë. Përpos LSI-së, krah presidentit Meta është rreshtuar edhe PD.
