Policia e Paraguajit ka vënë në pranga Elton Radovanin, djalin e ish-prefektit te Shkodrës, Paulin Radovani, të përfshirë në një skemë borxhesh dhe mashtrimesh. Eltoni ishte shpallur në kërkim nga Interpoli, pas zbulimit të skemës së fajdexhinjve në Shkodër.
Radovani është arrestuar më datë 3 tetor në Paraguaj, rreth orës 11:00, gjatë një kontrolli në një nga autostradat e këtij vendi.
Tashmë djali i ish-prefektit pritet që të ektradohet drejt Shqipërisë.
Një operacion i policisë së Shkodrës u finalizua me arrestimin e 12 personave, mes tyre edhe Ilir Sokolin, një ish-drejtor i LSI. Policia sekuestroi 20 makina, qindra mijëra euro, 50 celularë dhe dokumente që sipas njoftimit zyrtar, grupi iu kishte marrë borxhlinjve.
Pjesë e këtij grupi ishin edhe dy djemtë e ish-prefektit të Shkodrës, Paulin Radovani, Eltoni dhe Roberti. Dy djemtë e tij, një prej të cilëve anëtar në këshillin aktual të bashkisë Shkodër, Elton Radovani, kishin marrë hua shuma të mëdha parash tek persona të ndryshëm në Shkodër, të cilët ia lëshonin me një përqindje që varion nga 3-20%. Kështu bën të ditur Prokuroria e Shkodrës.
