Në shenjë pakënaqësie nga Lulzim Basha në drejtimin e PD-së, dhe në mungesë të reflektimit të tij, 51 anëtarë kanë vendosur të largohen nga partia. Drejtuesit e strukturave të degëve të Partisë Demokratike në Korçë, kanë dhënë dorëheqjen nga postet e tyre. Bëhet fjalë për 51 anëtarë të cilët dhanë dorëheqjen pas largimit të kryetarit të PD-së në këtë qytet, Andrea Mano dhe anëtarëve të Kryesisë.
Letra e plotë
Të nderuar demokratë dhe demokrate! Ne si, Kryetarë, Sekretarë dhe Kordinatore të Lidhjes Demokratike të Gruas, solidarizohemi me dorëheqjen e anëtarëve të Kryesisë së Partisë Demokratike Korçë dhe kemi vendosur të japim dorëheqjen nga funksionet tona drejtuese.
Gjykojmë që, lideri aktual i saj, po tenton me arrogancën e tij, ta kthejë Partinë Demokratike në një parti klienteliste në funksion të interesave të tij personale. Me veprimet e tij mendojmë se z. Basha ka hedhur poshtë të gjithë mundin dhe sakrificat tona në opozitën më të vështirë në historinë e Partisë Demokratike.
Të ndodhur në këto kushte 51 Drejtues Seksionesh dhe Lidhjes Demokratike të Gruas e gjejmë të pamundur të ushtrojmë funksionet tona drejtuese. Nga ky moment, ne mbetemi vetëm anëtarë të Partisë Demokratike Korçë.
Kjo lëvizje vjen pas dorëheqjes së ish-kryetarit të PD-së në Korçë, Andrea Mano dhe 13 anëtarëve të Kryesisë më 27 korrik.
Në shkresën e bërë publike për mediat, demokratët akuzojnë Bashën se me arrogancë po përpiqet ta kthejë PD-në një parti klienteliste dhe në funksion vetëm të interesave personale.
“Në kushtet aktuale, e gjej të pamundur ushtrimin e funksioneve të mia, dhe për këtë arsye jap dorëheqjen”, ka theksuar në letrën e tij të dorëheqjes Andrea Mano, ndërsa ka dhënë dorëheqjen edhe si anëtar i Këshillit Kombëtar të PD-së.
Anëtarët e dorëhequr të degës së PD-së në Korçë ishin të revoltuar nga arroganca, shpërfillja, nepotizmi dhe papërgjegjshmëria e lidershipit të PD-së. /Tirana Today
