Cilido ekip i Kategorisë Superiore dhe Kategorisë së Parë mund të gjejë strehë në stadiumin “Elbasan Arena”, por për një klub ky impiant është i ndaluar.
Elbasani që militon këtë sezon në Kategorinë e Dytë, e ka si mision të pamundur për të luajtur në “Elbasan Arena”. Ju duket e çuditshme? Këto janë në fakt çudira shqiptare!
Në kushtet kur FSHF-ja ia mohon mundësinë e zhvillimit të ndeshjeve në impiantin ku ka luajtur historikisht, skuadra verdheblu mbetet me shpresën që në fundjavë të ketë ndonjë stadium të lirë në qytetet afër, kryesisht në Peqin dhe Cërrik.
Ndeshja e vlefshme për javën e 10-të mes Elbasanit dhe Murlanit është spostuar për t’u luajtur nesër në kompleksin “Internacional” në Pezë-Helmes. Kjo për të vetmen arsye pasi të gjitha fushat kanë qenë të zëna.
