Bota e futbollit është në zi pas lajmit për ndarjen tragjike nga jeta të ish-portierit austriak Alexander Manninger, i cili humbi jetën në moshën 48-vjeçare.
Sipas raportimeve të para, ngjarja e rëndë ndodhi në orët e para të mëngjesit pranë Salzburg, ku automjeti me të cilin udhëtonte u përplas nga një tren teksa po kalonte në një vendkalim hekurudhor pa barriera. Pavarësisht ndërhyrjes së menjëhershme të ekipeve të emergjencës, për ish-portierin nuk u arrit të bëhej asgjë.
Alexander Manninger kishte një karrierë të pasur në futbollin evropian, duke lënë gjurmë të veçanta në Itali, ku veshi fanellat e disa klubeve të njohura si Fiorentina, Torino, Bologna, Brescia, Siena dhe Juventus.
Lajmi për vdekjen e tij u bë i ditur fillimisht nga Red Bull Salzburg, i cili shprehu ngushëllimet për humbjen e ish-lojtarit, duke theksuar kontributin e tij në futbollin austriak dhe ndërkombëtar.
Autoritetet pritet të hedhin më shumë dritë mbi rrethanat e aksidentit në orët në vijim, ndërsa komuniteti sportiv ka nisur të reagojë me mesazhe dhimbjeje dhe respekti për figurën e tij.
