Lëvizja Socialiste për Integrim ka vijuar akuzat për sa i përket mosfunksionimit të radarëve për monitorimin e hapësirës detare.
Përmes një deklarate për shtyp, nënkryetari i LSI-së, Luan Rama tha se do të kërkojë në Komisionin e Sigurisë, nisjen e seancave dëgjimore lidhur me titullarë dhe funksionarë të shtetit për mosfunksionimin e radarëve të monitorimit të hapësirës detare, detarëve të ministrisë së Mbrojtjes dhe atyre të Policisë së Shtetit.
Luan Rama e quajti këtë një skandal të patolerueshëm dhe të pafalshëm, për të cilin tha se duhen nxjerrë përgjegjësit.
FJALA E LUAN RAMËS:
Në kulmin e trafikut të kanabisit drejt Italisë, nuk kanë qenë në punë radarët. Ju e dini që gati 2 muaj më parë kjo çështje u bë publike për shkak të një letre që drejtori i Policisë së Shtetit dërgoi ministrit të Brendshëm, ku e vinte në dijeni që veprimi është i pamundur për shkak të mosfunksionimit të sistemit të radarëve.
Kjo është e vërtetë edhe nga investigimi që kam bërë, ku rezulton se sistemi i radarëve që mbikëqyrin hapësirën detare të policisë nuk është funksional. Ka vite që hapësira detare nuk monitorohet. Problemi bëhet edhe më i rëndë, pasi edhe 11 radarët që disponon Policia e Shtetit nuk kanë qenë në punë.
Ajo që duhet bërë është nxjerrja menjëherë e përgjegjësisë të funksioneve që nuk kanë kryer këtë detyrë.
Do i propozoj komisionit të sigurisë seanca dëgjimore me të gjithë funksionarët e lartë, titullarët që kanë lidhje me garantimin e sigurisë kombëtare.
Gjej rastin ta përshëndes nismën e 2 ministrave Xhafaj dhe Xhaçkës që kanë krijuar një grup të përbashkët për të identifikuar probleme që kanë të bëjnë me mosfunksionimin e hapësirës radare.
Duhej të ishte nisur një hetim nga prokuroria.
