Sikundër është bërë me dije edhe më herët, sot pritet që të zbardhen pamjet e kryebashkiakut që po festonte mandatin me kokainë. Mëngjesin e sotëm janë publikuar disa sekuenca (foto) në emisionin e Enkel Demit, ‘Abc-ja e Mëngjesit’, ndërsa videoja e plotë pritet të publikohet nga Artan Hoxha në orët në vijim. Enkel Demi zbuloi ndër të tjera se gazetari investigativ duhej të ishte në studio, për të treguar disa detaje më tej lidhur me këtë rast, por ai e ka fikur telefonin.
“Artan Hoxha disponon videon e plotë. Këto janë vetëm disa sekuenca. E kishim lënë që ta kishim Artan Hoxhën në emision, por nuk përgjigjet në telefon. Në këto pamje shohim një zotëri që është duke thithur kokainë në një bar publik.
Nuk është identifikuar publikisht, por ne e dimë emrin dhe mbiemrin e tij. Gazetari Artan Hoxha ka patur një punë deri vonë, prandaj nuk është i disponueshëm. Por gjatë ditës ai do të sqarojë dhe do të publikojë të plotë videon. Siç është thënë edhe në disa portale, kryebashkiaku po festonte marrjen e mandatit duke konsumuar kokainë”, përfundoi Enkel Demi.
