Ish-ministri i Drejtësisë, Ylli Manjani, ka reaguar lidhur me shoqërimin në polici të një gruaje 45-vjeçare, pasi kjo e fundit ka qeshur gjatë një aktiviteti të kryeministrit Edi Rama në Tiranë. Më tej është bërë shoqërimi në polici, me arsyetimin se kishte prishur rendin dhe qetësinë publike. Rasti në fjalë ka ndodhur në datën 15 tetor në kryeqytet, në rrugën “Fuat Toptani”, ku gruaja, 45-vjeçarja Teuta Baçi është vënë në pranga, pasi akuzohej për prishje të qetësisë publike.
Rasti flagrant është publikuar në rrjetet sociale nga gazetarja Anila Hoxha, e cila ka siguruar dhe dokumentin e Policisë së Shtetit për aktin e shoqërimit. Në dokument thuhet se një grua nga Dibra është arrestuar dhe shoqëruar në polici, vetëm sepse ka qeshur me zë të lartë, gjatë kohës që në rrugë kalonte kryeministri Edi Rama.
Manjani shprehet se shoqërimi pa shkak ligjor dhe në mënyrë masive i njerëzve në polici, është simptomë e rëndë e policimit abuziv. Duke qëndruar në të njëjtën linjë, po sipas tij, trajtimi i të shoqëruave si të dënuar apo si ndëshkim për diçka, quhet vetëgjyqësi dhe duhet dënuar.
Statusi
Policia e Shtetit jo sot, por ka kohë që është një sjellje flagrante antiligj, sa i takon shoqërimit të njerëzve në polici.
Shoqërimi i zonjës me arsyetimin “ça ke që qesh”, është fundi i çdo llogjike!!!
Nuk mund të mos përmendim me këtë rast sjelljen brutale të saj në abuzim të plotë me ligjin dhe detyrën kur:
-përdori gaz lotsjellës ndaj banorëve civilë në banesat e tyre tek bulevardi i ri,
-rrahu barbarisht tek unaza e re njerëz pa lidhje,
-dhunoi jo proporcionalisht njerësit dhe haptazi pa ligj shembi Teatrin Kombëtar, -arrestoi dhe ndërhyri në banesa private tej orareve të lejuara dhe rregullave bazë të privatësisë protestues që nga Kukësi e deri në Vlorë,
-kontrolloi e paautorizuar nga gjykata me skafandra e veshje anti plumb në banesat e gjykatësve,
-rrahu e të riun tek diga e liqenit (pavarësisht sjelljes së mamasë së tij),
-U soll keq dhe shumë keq në raport me ligjin në pandemi, etj etj…
Por shoqërimi pa shkak ligjor dhe në mënyrë masive i njerëzve në polici është simptomë e rëndë e policimit abuziv.
Më keq akoma trajtimi i të shoqëruave si të dënuar apo si ndëshkim për diçka, (le pastaj kur kjo diçkaja është urdhër i të madhit) quhet vetgjyqsi dhe duhet dënuar.
Këtë sjellje abuzive, haptazi kundër ligjit mund ta ndalojë vetëm Prokuroria dhe Drejtësia. Nuk e ndalon politika, por Drejtësia!
Është momenti që drejtësia të tretojë që është të paktën mbi policinë.
