Çdo vit e më tepër numri i turistëve në Shqipëri sa vjen edhe rritet. Dhe si çdo herë, destinacioni i preferuar vazhdon të jetë Jugu i vendit. Teksa për vizitorët e huaj çmimet janë normale dhe për shumëkush edhe të lira, për vetë shqiptarët Jugu është i “pamundur”. Me hapjen e sezonit turistik, fillojnë edhe denoncimet nëpër rrjete sociale dhe portale të vetë qytetarëve.
Që nga denoncimi i omëletës e cila kushtonte 800 lekë, për një makiato në Livadh duhet të paguash 180 lekë; e shumë raste të tjera.
“Për shqiptarët të shtrenjta janë gjithmonë, nuk ka pushime sepse nuk kemi mundësi.”
“Për rrogat që marrim ne janë çmime shumë të shtrenjta. Nuk ka punë, e kur nuk ka punë si mund të ketë ekonomi?!
Përballë çmimeve të larta, shumë shqiptarë kanë zgjedhur që pushimet e verës t’i kalojnë jashtë vendit.
“Unë pushimet i kalova në Turqi, sepse ishte shumë herë më lirë se të shkoja në Jug.”
Duke krahasuar Jugun me jashtë, është shumë herë më mirë të udhëtosh jashtë vendit. Sigurisht që për plazhe është shumë më mirë këtu në Shqipëri, por sa i takon çmimeve është pak më lirë jashtë.”
Ndërkohë të tjerë qytetarë janë nostalgjikë për pushimet e kaluara vite më parë.
“Hera e fundit që kam shkuar për pushime ka qenë në kohën e Enverit, isha në Theth të Shkodrës. Kam shkuar në vitin ’85 me vetëm 120 lekë së bashku me gruan për 15 ditë. Kurse tani e shohim Thethin nga televizori se nuk kam mundësi ta vizitoj. Erdhën këta nga jashtë dhe po e gëzojnë, kurse ne rrimë ngrohemi në diell.”
Për opinionistin Mustafa Nano, në Shqipëri janë dy kategori njerëzish të pasurit dhe të varfrit. Por, numri i të varfërve është më i lartë, duke mos i dhënë mundësi të kenë shumë të ardhura për të pushuar.
“Një pjesë e shqiptarëve mund të bëjnë pushime si turistët që vijnë të vizitojnë Shqipërinë. Ka njerëz që nuk i blen dot, ka njerëz që i blen. Shqipëria është e polarizuar ka të pasur, ka dhe të varfër. Por, vendi ynë është më i varfër se vendet e tjera.” TIRANA TODAY
