Pas vendimit për Saimir Tahirin, ka reaguar kryediplomatja amerikane Yuri Kim, e cila thekson se s’ka më të paprekshëm.
“Nuk ka më pandëshkueshmëri”. Ky është reagimi që ka bërë ambasadorja amerikane Yuri Kim, pas dënimit me burg të ish-ministrit të Brendshëm, Saimir Tahiri. Në një postim në Twitter, Yuri Kim u bën thirrje institucioneve gjyqësore, që të vijojnë të tregojnë se asnjë nuk mund të qëndrojë mbi ligjin.
Postimi i Yuri Kim:
“I bëjmë thirrje institucioneve gjyqësore, që të vazhdojnë të demonstrojnë se askush – pavarësisht partisë, pozitës apo pasurisë – nuk është mbi ligjin. Jo më pandëshkueshmëri”.
Sakaq, vlen të përmendet se Apeli i GJKKO vendosi lënien në fuqi të vendimit të parë ndaj ish-ministrit Tahiri, pasi sipas trupës gjykuese, është faktuar lidhja e tij me Habilajt dhe gjatë kohës që ka qenë ministër ka shpërdoruar detyrën.
Asokohe Tahiri u dënua me 5 vite burg, dhe nga gjykimi i shkurtuar në 3 vite e 4 muaj që më pas u konvertua më shërbim prove. Në vendimin e sotëm, Apeli ndryshoi vetëm këtë pikë të dënimit, duke e dënuar përfundimisht ish-ministrin me 3 vite e 4 muaj burg.
