Bashkia e Korçës konfirmoi më herët se vetëm këngëtari Shemsi Krasniqi nga grupi “Ilirët” do të jetë artisti i vetëm nga Kosova, që do të performojë në Korçë. Por ndërsa zhurma në rrjet ende vijon, duke kundërshtuar ardhjen e Goran Brezoviç, edhe këngëtari i fundit që njoftoi prezencën e tij, është tërhequr nga festivali.
Me anë të një deklarate publike, Krasniqi ka dhënë arsyet e tërheqjes nga ky event, që këtë vit bëri bujë më shumë se çdo herë tjetër. Ai ka thënë se arsyeja e tërheqjes së tij është se pjesëmarrja e Brezoviç nuk ka lidhje me artin.
“Unë e kam menduar se kjo ka lidhje me art, por po e shoh që kjo nuk ka lidhje fare me art. Këtu kam gabuar pak dhe e pranoj gabimin tim, se unë jam muzikant, nuk jam politikan. Kjo ka marrë një konotacion politik dhe unë kam vendosur që për këtë shkak të tërhiqem nga ky event”, është shprehur ai.
Shemsi Krasniqi ka deklaruar se ka dashur të këndojë për publikun shqiptar, pasi ishte hera e parë që do të performonte në qytetin e Korçës.
“Kam pas dëshirë të flaktë të shkojë në Korçë, se nuk kam kënduar kurrë në Korçë. Kam dashur ta këndojë atje këngën “Xhamadani vija vija”, këngën e Adem Jasharit. T’ja këndoj masës, por për shkak të krejt rrethanave që kanë ndodh, unë nuk do të shkoj në Korçë”.
