Presidenti Ilir Meta i ka dërguar një letër homologut të tij italian, Sergio Mattarella.
Në letrën e dërguar, kreu i shtetit ka shprehur solidaritetin e tij dhe të gjithë popullit shqiptar, në lidhje me situatën e krijuar nga koronavirusi në shtetin fqinj.
Gjithashtu, Meta tregon mbështetjen e tij për masat e marra nga autoritetet Italiane, duke i konsideruar ato si shumë të rëndësishme për të gjithë rajonin.
Njoftimi i presidencës:
Presidenti i Republikës së Shqipërisë SH.T. Z Ilir Meta i ka dërguar sot një letër Presidentit të Republikës të Italisë Sh.T.Z Sergio Mattarella, në të cilën shpreh solidaritetin e tij dhe të gjithë popullit shqiptar mbi situatën e krijuar së fundmi në vendin fqinj nga përhapja e virusit COVID-19, si dhe ngushëllimet për humbjet e jetëve nga ky virus.
Presidenti Meta mbështet masat e detyruara të marra me përgjegjësi të lartë shtetërore nga autoritetet Italiane dhe i vlerëson këto masa si mjaft të rëndësishme jo vetëm për Italinë por dhe për të gjithë rajonin.
Duke shprehur bindjen se përpjekjet e autoriteteve italiane për të izoluar këtë epidemi shpejt do të japin rezultate dhe do të kthejnë normalitetin në jetën e italianëve, Presidenti Meta nënvizon se angazhohet për të forcuar bashkëpunimin ndërmjet autoriteteve shëndetësore të të dy vendeve në përballimin e kërcënimit të kësaj epidemie.
