Ish-presidenti i vendit, Bamir Topi, ka komentuar situatën e përplasjeve institucionale për ringritjen e Gjykatës Kushtetuese.
I ftuar në emisionin “Kjo Javë” në News24, Topi tha se edhe në kohën kur ai ishte president, debatet politike merrnin zgjidhje nga Kushtetuesja. Sipas tij, kjo gjë sot është thuajse e pamundur, teksa e cilëson këtë situatë mjaft të rëndë.
“Situata natyrisht është tepër e rëndë. Nuk kam nevojë ta mbush opinionin publik me pesimizëm, por po ndaj një opinion që vjen si pasojë e njohjes së realitetit , por edhe si pasojë e eksperiencave të gjata politike. Gjithçka fillon dhe e ka origjinën tek politika. Politika ndërton institucionet, ndërton debate dhe bën sherret. Në rastin konkret jemi në një situatë gati gati të pashpresë për ta zgjidhur, përplasjet e palëve i janë drejtuar Gjykatës Kushtetuese, dhe tani bëhet fjalë për një institucioni të munguar”, tha ai.
Ish-kreu i shtetit tregoi detaje edhe për bisedën që ka bërë me presidentin Meta në lidhje me ngërçin e krijuar.
“Nuk ishte rasti për ta këshilluar .U njoha për situatën në detaje dhe patjetër që është vetë presidenti që merr të gjitha iniciativat. Unë e thashë se të gjithë presidentët kanë shërbyer në kohëra tjera. Unë besoj se jemi në situata të tjera. Mbas vitit 2008, e gjithë situata e institucioneve është pak a shumë e njëjtë. Sepse pati një ndryshim institucional të institucioneve. Institucioni i Presidentit mbeti në terminal. Gjithçka vendoset nga maxhoranca e radhës. Sot kemi një kryeministër, kemi apo s’kemi parlament nga pikëpamje e fuqisë politike, them që jo. Nga ana tjetër kemi një braktisje nga opozita institucionale. Nga ana tjetër kemi presidentit, që relativisht është i dobët si institucion, jo si individ”, deklaroi ish-presidenti Topi.
