Vazhdojnë përplasjet ndërmjet rebelëve dhe ushtrisë siriane të udhëhequra nga Bashar al-Assad. Al Jazeera raporton se dje është rrëzuar një prej helikopterëve të ushtrisë sirianë gjatë përplasjeve që po bëhen në bastionin e fundit të rebelëve.
Përplasjet midis rebelëve dhe ushtrisë kanë qenë me pasoja për mijëra civilë, të cilët kanë qenë të detyruar të shpërngulen nga zonat e luftës.
Sipas raportimit të televizionit shtetëror sirian, helikopteri u godit nga një raketë e forcave rebele ditën e premte në afërsi të qytezës Urum al-Kubra.
“Një raketë armike shkaktoi rrëzimin e helikopterit, duke lënë pas të vdekur të gjithë personat që ndodheshin në të”, raportoi agjencia “SANA”, pa dhënë informata për atë se kush qëndron prapa këtij sulmi.
Nga ana tjetër, Fronti Çlirimtar Kombëtar mori përgjegjësinë për rrëzimin e helikopterit përmes një deklarate. Ky është helikopteri i dytë që rebelët rrëzojnë në pak ditë.
