Philippe Coutinho, një nga futbollistët më të mirë brazilianë të momentit është duke kaluar një periudhë aspak të mirë te Barcelona. Në moshën 18-vjeçare, Coutinho vendosi të kalojë oqeanin dhe të luaj në Europë. Ai u transferua në Serie A, për të luajtur me Interin, që asokohe drejtohej nga Rafa Benitez.
Aventura e tij me fanellën zikaltër nuk ishte ndër më të mirat dhe shpejt lojtari u largua tek Espanyol e më pas te Liverpool, ku dhe shkëlqeu.
Më pas erdhi transferimi te Barcelona dhe sërish nisi kriza, aq sa pas 18 muajsh ekipi “blaugrana” është gati ta shesë lojtarin. Edhe pse janë përmendur shumë alternativa për të ardhmen e Coutinho, duket se vetë braziliani ka një ide. Përmes një deklarate për mediat, pas fitores që Brazili arriti në miqësore ndaj Republikës Çeke, Coutinho jep një sinjal të qartë.
“Inter? Një skuadër ku kam luajtur dhe kam kujtime shumë të mira. Aty kam ende shumë miq, një vend i shkëlqyer. Të luaj sërish aty? Nuk e di, unë jam një lojtar i Barcelonës, kam një kontratë aty”, u shpreh Coutinho.
