Si Ankaraja ashtu edhe Athina kanë pozicionuar anije luftarake në zonën detare mes Greqisë dhe Qipros, pasi Turqia njoftoi se kishte nisur kërkimet për gaz dhe naftë. Në Mesdheun Lindor, shenjat janë për një erë lufte. Greqia dhe Turqia kanë patur marrëdhënie të tendosura dhe kanë qenë në mosmarrëveshje për dekada të tëra për një sërë çështjesh. Ato kanë qenë në prag të luftës tre herë, që nga mesi i viteve 1970, ndër të tjera edhe mbi të drejtat e eksplorimit të pasurive nënujore. Zbulimet e fundit të gazit natyror në Mesdheun Lindor kanë ripërtërirë tensionet.
Në ditën e nisjes së stërvitjes rutinë të forcave ajrore, ministri turk i Mbrojtjes, Hulusi Akar ka dhënë një mesazh të fortë. Siç raporton “Hurriyet”, Akar hipi në njërin prej avionëve F-16 që ka flota ajrore turke, duke dhënë një mesazh force, ndërsa në zbritje tha se askush nuk do të lejohet të bëjë të fortin në Egje.
“Ata që vijnë nga mijëra kilometra larg këtu për t’u dukur sikur duan të vendosin paqen, ndërkohë që bëjnë të fortin, nuk do të kenë asnjë shans. Siç erdhën ashtu edhe do të ikin”, tha ai.
Franca ka dërguar në Egjeun Lindor aeroplanmbajtësen “Charles de Gaulle”, duke mbështetur Greqinë, ndërsa Turqia njoftoi se në zonën ku ndodhet anija Oruç Reis do të kryejë stërvitje me zjarr të vërtetë me flotën ruse.
