Ministri i Brendshëm, Sandër Lleshaj ka folur rreth operacioneve të fundit të zhvilluara nga “Forca e Ligjit”.
I ftuar në emisionin “Open”, Lleshaj u shpreh se ende është herët për të folur për rezultate në lidhje me aksionet e zhvilluara.
“Nuk mund të flasim për rezultate sepse është vetëm fillimi. Normalisht fillimi ka dinamikën e tij”, tha ai.
Më tej ai u pyet se sa është numri i personave që do merren nën hetim dhe se si janë zgjedhur specifikisht këto emra.
“Unë nuk i zgjedh emrat. Jam ministër i Brendshëm. Të gjithë e dinë se kush janë sepse ligji i ka përcaktuar mirë. Të gjithë personat që janë dënuar për vrasje, trafik narkotikësh, terrorizëm dhe kanë pasuri që si justifikojnë. Nuk ka rëndësi sa është numri. Numri mund të jetë 250, 300. Nuk ka rëndësi numri”, deklaroi ai.
