Numri i punonjësve të personelit mjekësor të infektuar me koronavirus në Senatorium është rritur.
Zv/ministrja e Shëndetësisë Mira Rakacolli ka njoftuar se nga testimet e kryera për koronavirus në 24 orët e fundit, rezultojnë se janë prekur edhe 4 pjesëtarë të tjerë të personelit mjekësor në spitalin “Shefqet Ndroqi”.
Bëhet fjalë për një mjek dhe 3 infermiere të cilët kanë qenë në kontakt me një të afërm të një pacienti që ka qenë i shtruar në spitalin “Shefqet Ndroqi”.
“Personi i afërm” që vinte nga Italia, nuk e kishte dhënë fare si informacion tek stafet mjekësore dhe për pasojë ka infektuar 6 persona të personelit mjekësor në Senatorium.
“Siç ju kemi njoftuar, nga gjurmimi i kryer, ky pacient është vizituar në spital nga një i afërm që vinte nga Italia dhe që NUK E KA DHËNË KËTË INFORMACION TEK STAFET MJEKËSORE. Personeli është në gjendje të mirë shëndetësore”, tha Rakacolli duke i bërë apel njerëzve që të deklarojnë udhëtimet e tyre pasi kjo mund të kthehet në problem për të tjerët si në rastin e mjekëve të Senatoriumit.
Në total për momentin janë 6 punonjës të personelit mjekësor të spitalit “Shefqet Ndroqi”që kanë rezultuar pozitiv për koronavirus pasi 2 ishin konfirmuar ditën e djeshme.
