Tërmeti i 26 nëntorit la pas shumë viktima e të plagosur.
Po ashtu të shumtë në numër janë edhe personat që përjetuan stresin post-traumatik.
Psikologia Anxhela Peza ishte e ftuar ditën e sotme në emisionin “Rudina”, ku tregoi disa nga mënyrat sesi njerëzit mund të lehtësojnë dhe kalojnë përjetimet negative.
“Specialistët e shëndetit mendor, në katastrofat natyrore, në ekspozimin e individit përballë traumave psikologjike, ndihmojnë që të kapërcejnë atë që pengon jetën e tij, përditshmërinë dhe psikikën e tyre.
Biseda ndihmon…. kur t’i ke ngecur në traumën tënde sesi e ka parë ngjarjen, kur e ritregon ka një efekt psikologjik që tregon se ndoshta nuk ka qenë aq keq sa ti ke grackën e traumës. Kur ti i rikthehesh rutinës, ti në darkë ke lodhje fizike dhe mendore dhe gjumi jot është më i rehatshëm, kjo është një nga sugjerimet që ne bëjmë.
Sugjerimi tjetër është që të mos largoheni, për shembull të bëni një udhëtim jashtë, apo të ikni e të harroni gjithçka, sepse ajo do të mbetet aty dhe herë pas here ke “flashback” (kthim pas) dhe do të shfaqet ajo çfarë ka ndodhur, do t’i kesh ndjesitë e lëkundjes apo ndjesitë e tjera sepse ti do të rikthesh sërish në të njëjtën shtëpi apo vend.
Mirë është që të jetë faktori kohë ai që ta bëjë të kuptosh më mirë se çfarë ka ndodhur, përveç se të qëndruarit me familjarë apo njerëz pozitivë që të mbështesin në raste të tilla.
Mund t’i drejtohen për ndihmë edhe psikologut, psikiatrit, punonjësit socialë, etj.
Jam e bindur që do të ngrihen nga Urdhri i Psikologut struktura sociale, ndihmuese ndaj këtyre kategorive, sepse kjo që ndodhi do të jetë prezente për vite me radhë. Nëse ndodh diçka tjetër, një divorc, humbja e një pune, i rikthehet edhe një herë kjo gjë sepse nuk është trajtuar siç duhet në kohën e duhur”, tha ajo.
