Qeveria shqiptare ka dhënë 3 koncesione për ndërtimin e inceneratorëve në Tiranë, Elbasan dhe Fier. Në Elbasan është ndërtuar në fillim të 2017-s. Ndërkohë, në Fier punimet ende nuk kanë filluar, si pasojë e protestave të banorëve.
Në kryeqytet, ndërtimi pritet të fillojë në muajin qershor, në landfllin e Sharrës, i cili ka kaluar në pronësi të kompanisë Integrated Energy. BV.
Kreu i Departamentit të Mjedisit në PD, Jamarbër Malltezi në një intervistë për Tirana Today thotë se kontrata e Tiranës dhe ajo e Fierit nuk janë publikuar në fletoren zyrtare.
“Po na vidhen 178 milion euro dhe gjithçka përfundon vetëm te një dorë, te ajo e sekserit të Arben Ahmetaj. I cili brenda dy javësh fut në xhep 13 milion euro,”-shton Malltezi për Tirana Today.
Ambientalisti Lavdosh Ferruni shprehet se qëllimi pas kësaj është thjesht fitimi i një grupi të caktuar njerëzish.
Sipas ekspertëve këto inceneratorë vendosin në hije ricikluesit në vend.
“Po t’i çosh të gjitha mbetjet vetëm në dorën e Klodian Zotës, padyshim që ngec riciklimi. Qeveria duhet të nxiste riciklimin dhe jo incenerimin,”-thotë Malltezi.
“Incenerimi është konkurrenti më i fortë i fabrikave të riciklimit dhe i eklipson ato,”-shton Ferruni.
Sipas ekspertëve, Shqipëria nuk prodhon mjaftueshëm mbetje për tre inceneratorë, pasi volumi i mbetjeve që duhen për to, do të jetë shumë i madh.
“Këtu fshihet lepuri sepse qeveria kërkonte me insistim futjen e importit të mbetjeve. Sepse në incenerim nuk mund të shkojnë më tepër se 20% e mbetjeve, në do të çosh më tepër harxhon energji,”-shpjegon Malltezi. Tirana Today
