Deputeti i PS-së, njëherësh dhe Kryetari i Komisionit të Ligjeve, Ulsi Manja ka reaguar lidhur me deklaratën e presidentit Meta për anulimin e datës së zgjedhjeve vendore.
I ftuar në “Repolitix”, Manja edhe njëherë akuzoi Metën se vendimi i tij është antikushtetues, ndërsa shtoi se nuk e di se si do e zgjidhë krizën politike në vend.
Ndër të tjera, deputeti theksoi se sipas tij, presidenti nuk caktoi një datë të re zgjedhjesh, pasi nuk e lejon Kushtetuta.
“Unë pashë vetëm konfuzion. Patjetër që do të kalosh në sofizma. E di edhe presidenti, pasi nuk është vetëm përgjegjësi vetëm e tij. Është Parlamenti mbartës i sovranit. Kur nuk flet në gjuhën e Kushtetutës bën të tilla deklarata, duke thënë se nuk do të ketë zgjedhje pa dekretin tim. Presidenti po qe se do të kishte caktuar një tjetër datë… pse nuk e bëri? Pse nuk caktojë një tjetër datë zgjedhjesh. Po nuk e lejon kushtetuta. Nuk di si do ta zgjidhi ai krizën që ka shkaktuar. Ne jemi për 30 qershorin dhe kjo garanton stabilitetin e vendit. Është akt juridik inekzistent. Pasi nuk ka efekte juridike. Nuk do kishim proces zgjedhor kur presidentit i mbushet mendja sa herë për të çdekretuar vetveten”, deklaroi Manja.
