Në një komunikim me ndjekësit në rrjetet sociale, një nga qytetarët e ka pyetur kryedemokratin Berisha se si do të bëhet bashkimi i PD-së për të shkuar në zgjedhjet vendore me kandidatë të përbashkët. Kreu i Partisë Demokratike pohoi se është gati të bashkëpunojë me këdo, por nga primaret nuk mund të heqë dorë dhe as nuk do t’i zëvendësojë ato me sondazhe. Ish-kryeministri akuzoi Ramën se përçarja e PD-së është vetëm në interes të tij, ndërsa shtoi se kreu i qeverisë “betejën e ka me 11 dhjetorin sepse atë tjetrën e kishte në xhep.”
“PD e vërtetë, e rithemeluar, ka përcaktuar një procedurë që s’ka demokrat që normalisht duhet ta refuzoje. Por kur 1 vit më parë kaloja nga foltorja në foltore për peng Bashën, kishte edhe të tjerë skeptikë.
Sot besoj që është e qartë se të gjitha ato janë përpjekje të Edi Ramës, dhe s’kanë asgjë të përbashkët me PD. Kam qenë dhe jam i hapur që çdo deputet, anëtar i kësaj partie të kandidojë për primare.
Por, s’kam qenë kurrë i hapur të heq dorë nga primaret dhe aq të zëvendësoj primaret me sondazhet. Edi Rama, betejën e ka me 11 dhjetorin, se atë tjetrën, siç provuan kohërat e kishte në xhep.”
