Kryeministri Edi Rama, ka takuar mëngjesin e së shtunës fermerët e Lushnjes, ndërsa ka qenë i shoqëruar nga ministrja e Bujqësisë Frida Krifca dhe deputeti Taulant Balla. Gjatë bashkëbisedimit, një nga sipërmarrësit e zonës u bëri thirrje emigrantëve që kanë shkuar jasht dhe punojnë në bujqësi, që të kthehen, pasi pagat nuk janë aq sa thuhet. Madje ai tha me shaka se rrogat janë rritur më shumë se çfarë deklarojnë.
“Sot tregu ka një etje, që këto miliona euro që ne po diskutojmë, i realizon shumë shpejt industria përpunuese. Ka shumë për të thënë, po unë u bëj thirrje të gjithëve të kthehen, se rrogat ne i kemi çuar më shumë se ç’deklarojmë”, u shpreh ai.
Marrë shkas nga kjo deklaratë, një reagim ka ardhur nga kreu i qeverisë Edi Rama. Sipas tij, kjo është në dëm të shtetit por ata e kanë toleruar fshatin.
“Edhe e thotë ky këtë, dhe e dini pse e thotë? Sepse ndërkohë ne kemi sektorin më të pataksuar bujqësor të botës. Të gjithë marrin më shumë se ç’deklarohet. Ky është problem për ne si shtet, por të fshati nuk e kemi gërmuar këtë pjesë”, tha kryeministri.
