Kryeministri Rama ka ndarë me ndjekësit e tij në Facebook disa foto nga Teatri i Operas dhe Baletit, tashmë i rikonstruktuar. Kreu i qeverisë shpreh keqardhjen që yje të konematografisë shqiptare janë shuar, pa pasur mundësinë për të luajtur në një skenë ashtu siç e meritonin, e ndërsa thotë se përgjigje për këto protesta do të jetë Teatri i ri.
Rama teksa komenton protestën e Aleancës për Mbrojtjen e Teatrit, ironizon të rinjtë që ishin dje në shesh. Sipas tij, falë skenave të reja kombëtare, ajo e Operas e Baletit dhe e Teatrit Kombëtar, vendi ynë ka pësuar një ndryshim rrënjësor. E sa i takon të rinjve protestues, Rama e ka një koment duke thënë se do e kuptojnë një ditë se kanë gabuar.
Statusi
MIRËMËNGJES
Dje, duke vizituar kantierin e Teatrit të ri të Operas dhe Baletit, ku po përfundon një transformim fantastik brenda asaj hapesire deri dje të degraduar që turpëronte Shqipërinë e shtetin e saj, m’u kujtua që 21 vjet më parë, tamam në të njëjtin vend mbi skenë, nisi beteja publike për reformimin e sistemit teatror shqiptar dhe rindërtimin me themel të skenës kombëtare e të vetë Teatrit Kombëtar…
Sa shumë energji të harxhuara e vite të humbura kot për komunitetit tonë teatror, që qysh atëherë kaloi edhe 20 vjet të tjera në kushtet e një mizerjeje pa të dytë në Europë dhe sa keq për publikun artdashës, që nuk pati dot kurrë mundësinë të shijonte artet skenike në kushte dinjitoze as në TKOB e as në Teatrin Kombëtar!
Sa keq që tërë ato yje të skenës sonë kombëtare u shuan, pa punuar dot një ditë në një skenë normale dhe një gjeneratë e tërë u moshua, pa shijuar dot kurrë një shfaqje në kushte normale!
Skenat e reja kombëtare, kjo e Operas e Baletit dhe ajo e Teatrit Kombëtar, përveç të tjerash do t’i ndihmojnë edhe disa të rinj që gabimisht u janë “bashkuar” ca politikanëve e partive si tallashi e teneqeja e ngrehinës së shembur, të kuptojnë nesër pse sot ia fusin krejt kot, kur revoltohen për monumentin imagjinar që mbajti peng artet skenike, komunitetin teatror dhe debatin për Teatrin e Ri Kombëtar, tash 21 vjet.
