Një ish-futbollist është ndarë nga jeta në moshën 37-vjeçare, për shkaqe ende të paqarta. Ish-futbollisti Maksim Tsigalko ka ndërruar jetë në moshën 37-vjeçare. Lajmi i trishtë është konfirmuar nga klubi i Dinamos së Minsk, nëpërmjet një postimi në faqen zyrtare.
Në vitin 2010, bjellorusi u tërhoq nga futbolli për shkak të dëmtimeve, teksa vdiq në varfëri.
“Kampion i Bjellorusisë, fitues i Kupës së vendit me Dinamon. Ne i shprehim ngushëllimet tona të sinqerta familjes dhe miqve të Maksimit. Qoftë i përjetshëm kujtimi për të!”, shkroi klubi i Minskut në faqen e tij të internetit.
Tsigalko ishte sulmues i Dinamo Minskut në periudhën 2001-2004, duke shënuar 28 gola në 65 paraqitje.
Për fat të keq, pasi u tërhoq nga futbolli, askush nuk u kujtua për të. Ndodhur në ato kushte, i ndjeri ishte detyruar të punonte në ndërtim për 5 dollarë në ditë, teksa ditën e premte të 25 dhjetorit, zemra e tij pushoi së rrahuri.
