Është ndërprerë ëndrra e liderit të partisë së djathtë italiane “Lidhja” për të dominuar rajonin verior të Italisë. Italianët nuk e kanë votëbesuar Matteo Salvinin në zgjedhjet rajonale, duke shuar ëndrrën e tij se nëpërmjet fitores së zgjedhjeve rajonale mund të rrëzonte qeverinë qendrore.
“Shumica në pushtet ka dalë më e fuqishme nga zgjedhjet rajonale”, tha kryetari i Partisë Demokratike, Nicola Zingaretti, i cili shtoi se Salvini ka dështuar në përpjekjen e tij për ta rrëzuar qeverinë, shkruan “Reuters”.
Zgjedhjet janë dominuar nga kandidati i partisë Demokratike Stefano Bonaçini, i cili ka fituar 51.4 % të votave, teksa partia “Lidhja” e Salvinit ka mund të grumbullojë vetëm 43.7 % të votave.
Një fushatë e ashpër dhe e ngushtë, më herët Salvini pati premtuar se do të fitonte zgjedhjet rajonale dhe do të rrëzonte qeverinë qendrore.
“Unë nuk ndihem i mposhtur. Mund të fitoni dhe mund të humbni, por nëse humb, prapë do të jem i lumtur dhe do të punoj dyfish më shumë”, tha Salvini.
