Shkencëtarët janë në konkurrencë të fortë me njëri-tjetrin, për krijimin e një vaksine, për ti dhënë fund pandemisë. Disa janë aplikuar tek kafshët, e shumë të tjera tek njerëzit, por ende nuk ka një vaksinë funksionale.
Prodhuesi më i madh i vaksinave në botë është duke prodhuar në masë një vaksinë koronavirus të zhvilluar nga Universiteti Oxford, pa e ditur nëse vaksina është funksionale.
Instituti Serum i Indisë, i cili prodhon 1.5 miliardë doza vaksinash çdo vit për një seri sëmundjesh, ka konfirmuar se do të fillojë prodhimin përpara datës së provës në Oxford.
Grupi i Vaksinave në Oxford thotë se shpreson të përfundojë vlerësimin e vaksinës tek popullata në muajin shtator.
Injektimet e para nisën të enjten. Dy qytetarët e parë u injektuan me vaksinën në Oxford. Rreth 1.100 njerëz në Mbretërinë e Bashkuar do të injektohen si pjesë e provës, e cila financohet nga qeveria e Mbretërisë së Bashkuar.
“Ne mund të marrim të dhëna të mjaftueshme brenda disa muajsh, për të parë nëse vaksina funksionon. Por nëse niveli i transmetimit bie, kjo mund të zgjasë deri në gjashtë muaj,” tha grupi i studiuesve ditën e enjte. Grupi i shkencëtarëve shpreson të prodhojë një milion doza të vaksinës deri në shtator.
