Kryeministri i Kosovës, Avdullah Hoti, ka zhvilluar sot një bashkëbisedim me Asociacionin e Komunave të Kosovës.
Gjatë takimit online, Hoti iu prezantoi kryetarëve të komunave masat e reja që janë ndërmarrë me qëllim të parandalimit dhe menaxhimit të pandemisë.
Kryetarët e komunave treguan gatishmërinë e plotë të tyre për t’i bashkërenduar të gjitha veprimet e nevojshme, në mënyrë që situata e krijuar të përballohet sa më mirë.
Kreu i qeverisë kosovare tha se pas konsultimit me ekspertët dhe me drejtuesit e institucioneve kryesore shëndetësore të vendit, qeveria miratoi vendimin për masat e luftimit të pandemisë së koronavirusit.
Ky vendim detyron Ministrinë e Shëndetësisë dhe institucionet kompetente që t’i rrisin kapacitetet me shtretër dhe pajisje mjekësore për trajtimin e rasteve.
“Kemi paraparë mobilizimin e stafit shëndetësor në nivel vendi, duke përshirë sipas nevojave edhe ata profesionistë shëndetësorë që nuk janë të angazhuar momentalisht. Në veçanti, do të shtohen kapacitetet në shërbimin e mikrobiologjisë, infektologjisë dhe shërbimeve të tjera të lidhura drejtpërdrejt me rastet COVID 19”, tha Hoti.
