Sipërmarrësi i Biotech, Martin Shkreli, i cilësuar si shqiptari më i urryer në SHBA ka habitur me kërkesën e tij të bërë së fundmi.
Sipas mediave të huaja, Martin Shkreli ka kërkuar që të lirohet nga burgu, në mënyrë që të shpëtojë njerëzimin nga koronavirusi.
Sipërmarrësi kërkon të lirohet nga burgu për 3 muaj, për të bërë të mundur sipas tij, gjetjen e kurës ndaj pandemisë Covid-19.
“Po kërkoj një periudhë të shkurtër vetëm 3-mujore për të ndihmuar në punën kërkimore ndaj COVID-19. Të lësh botën të goditet nga Covid-19, nuk është aspak ngushëlluese as për të burgosurit vetë. Si një sipërmarrës i suksesshëm i Biofarmës, ku kam blerë kompani të shumta, unë jam një nga të paktët sipërmarrës me përvojë në gjitha aspektet e zhvillimit të ilaçeve, nga krijimi i molekulave, vlerësimet preklinike dhe deri te modeli i provës klinike”, thuhet në kërkesën e tij drejtuar autoriteteve amerikane.
Martin Shkreli po vuan dënimin në burgun federal të Pensilvanisë, teksa është dënuar me 7 vite burg pas akuzës për mashtrim. Në vitin 2017, Shkreli rriti çmimin e një ilaçi kundër AIDS-it me 5,000 përqind.
