Presidenti i vendit Ilir Meta e cilësoi 2019-ën – vitin e zhgënjimeve.
I ftuar këtë mbrëmje në emisionin “360 Gradë”, kreu i shtetit akuzoi kryeministrin Edi Rama se po shkatërron gjithë sistemin në vend për të qenë protagonist.
Sipas tij, tensionet mes Tiranës dhe Prishtinës janë të provokuara qëllimisht. Ndërsa shtoi se pas kësaj qëndron dëshira për t’i paraqitur shqiptarët sikur nuk arrijnë të marrin një vendim unanim a të kuptohen mes tyre.
“Tensioni nuk është i rastësishëm as në Shqipëri. Ndoshta pas gjithë këtij tensioni të sponsorizuar qëllimisht qëndron dëshira që të na paraqesin që shqiptarët nuk dinë të merren vesh. Nuk mendoj se është kështu. Ky ka qenë një vit zhgënjimesh në tërësi. Ky ka qenë një vit zhgënjimesh në tërësi, në të në gjitha drejtimet. Asgjë nuk duhet mohuar në jetën e njeriut dhe jetën e një vendi.
Tensioni në Shqipëri është i provokuar qëllimisht. Tensioni qëndron tek arbitrariteti i një individi që ka rrëzuar një sistem të tërë në vend me mjaft sukses dhe të gjitha këto dështime kërkon t’i mbulojë duke krijuar edhe debate plotësisht të pa nevojshëm. Është një strategji për të mbijetuar pa rregulla loje përmes presioneve, kapjes së medias, linçimeve”, u shpreh Ilir Meta.
