Kryeministri i vendit, Edi Rama është pyetur për shifrat e larta të azilkërkuesve shqiptarë në Evropë gjatë samitit të kryeministrave në Londër.
Për largimin e shqiptarëve drejt Anglisë , kreu i qeverisë tha se nuk është një tragjedi. Ai e krahasoi me italianët që lëvizin nga jugu në veri të vendit të tyre apo me kroatët që emigrojnë për një vend pune në BE. Gjithashtu Rama tha se kjo i jep mundësi shqiptarëve të njohin më shumë botën dhe nga kjo krijojnë dhe marrin eksperienca të reja.
“Vitin e kaluar kishte më pak shqiptarë se kroatë që iknin nga vendi i tyre, por kur vjen puna tek kroatët është më pak problematike se kroatët nuk i regjistron kush si problematikë sepse ata kërkojnë punë dhe nëse e gjejnë, mirë, nëse nuk e gjejnë kthehen sërish. Kurse për shqiptarët dhe të tjerët është histori tjetër. Por duhet ta njohim. Nuk ka recetë magjike. Dua të them diçka, rrjeti i emigracionit është i dyfishtë sepse shumë po largohen, por jo pak të tjerë po kthehen.
Balanca anon nga ana e njerëzve që po ikin, por shumë të tjerë po kthehen. Është një periudhë historike që të gjitha vendet e kalojnë. Edhe ne po e kalojmë tani. Kjo është. Nuk e kam parë kurrë si tragjedi, përkundrazi është një mënyrë për të parë botën, për të krijuar eksperienca dhe një mënyrë për të sjellë mënyra të ndryshme të të kuptuarit të botës etj etj. Nëse kthehemi pas në histori, vendet që na japin leksione për emigracionin janë pasuruar përmes emigracionit, nuk di vende që nuk e kanë kaluar këtë. Ne jemi të mallkuar në njëfarë mënyrë sepse po e kalojmë këtë fenomen në kohën e medias sociale, “Fake News” dhe ka shumë njerëz që kanë nisur fushata duke thënë boll se na lodhën ekspertët. Kur të hyjmë në tregun e madh do të jetë normale, siç është për shtetet e tjera anëtare”-deklaroi Rama.
Shqiptarët lanë shtëpitë e tyre dhe u larguan në masë në drejtim të BE-së,me shpresën se do gjejnë një jetë më të mirë. Shpërngulja të mëdha pati në kohën kur qeveria Rama ishte në vitin e dytë të qeverisjes. Ndërkohë kujtojmë se ka patur disa fshatra në Shqipëri, të cilët u shkretuan për shkak të eksodit të azilkërkuesve drejt BE-së.
Bashkë me sirianët dhe afganët që emigronin nga lufta, shqiptarët që emigronin në Gjermani kanë jetuar në kampet e azilkërkuesve duke u kthyer në shqetësim për vendet e BE-së.
Fillimisht kreu i qeverisë shqiptare deklaroi se shumë prej të larguarve ishin emigrantë nga Greqia, por tani Rama e justifikon me faktin se kjo është një strategji pozitive, e cila shërben si mënyrë e re për të parë botë me sy. Deklaratat e Ramës duken më tepër si një show fjalësh, ndërsa numërohen qindra e mijëra shqiptarë që largohen drejt vendeve të tjera, pasi nuk kanë shpresë në vendin e origjinës.
